Rev 3 | BEF | STEP | To Satisi hepato Hu'mamofihi bona'amagihi agelo ya suhi huto kaba hu noepalana bouba ka'a ma luto fayahi koyoto emilenogo lu epilibe: Hu'mamofihi meha'amofihi amuya 7 nehana hiti to sonofi'i 7 li'ehina lenali kumu ma luto lu'ehibe: Nani lite melete nehanamofihi hapa'a kumu keheli'ohube. Bona'magi enali lenubu gago lenubu hiti nehana'a keheli'ahanaya komopatini ya'ma fili'ehinamo nehana, akeheli'ohube.

Revelation of John 3

Satisi bonatoga ka'a molo'ehina

1 To Satisi hepato Hu'mamofihi bona'amagihi agelo ya suhi huto kaba hu noepalana bouba ka'a ma luto fayahi koyoto emilenogo lu epilibe: Hu'mamofihi meha'amofihi amuya 7 nehana hiti to sonofi'i 7 li'ehina lenali kumu ma luto lu'ehibe: Nani lite melete nehanamofihi hapa'a kumu keheli'ohube. Bona'magi enali lenubu gago lenubu hiti nehana'a keheli'ahanaya komopatini ya'ma fili'ehinamo nehana, akeheli'ohube. 2 Ya hu'ehina'mu lenali ya'ma mopo hite ho tilete kosaba'i luga'a fililune'mu nehana yamagihi komopa'ani le'mo hetofa hi epalalo. Nani afo'nifu Hu'mamofihi bulo lolo hite melete hite nehanamofihi bu nogogo mone'a bati mehibe. 3 Lenali ana'ina li nupa hite fi lehe toto lu lepito lenegekesa li'ehinamo le'mo kosaba hite li pili kete lite nehite foipanatini he'mite komopatini li gelehe hilo. Li gelehe hite kaba hite meminalana ya'ma luba li lepilube'mu hube. Kana'a nomolona ya'ma lenali mekeheli'ehinogo gumina baukalo bona mone'mofihi suhi huto mele'isi oto henetilube'mu hube. 4 To Satisi hepatoga bona'i nesi'a nehana lenali i kolo bise'natini oifa'i ilana suhi mehabe. To ya nehana'amagi minete koholi guketetinimofihi hapa'a lilete minalana nani hiti humofa'na hite minete lite hilana'mu yabe. Lenali ya suhi hilana bati hite minete nani hiti minalabe. 5 Luga'a enali mono kagu amuya melete mine lite bite Satahi luba'a be ligilana'a enali koholi gukete'animofihi hapa'a li bati hu epelenogo li ho kalalune'mu habe. To enigi'a ya'ma amuya enemehi hite minoba minoba nehana bona'magihi enigi'ani keye'ahana bukuguti kele lito mehe'milube'mu hube. Nani enigi'a to pana'ni nehabe luto ya'ma afo'nifihi bulo to agelomagihi enubulo lu huto malalube'mu hube.

6 Sikalafu'uba Hu'mamofihi yagapana'a li gehesa hi'ahana ya'ma kaga ya luto lu noepina ya'ma enegekesa hokolo hinogo keheliya ite kehelilabe.

Filatelefia bonatoga ka'a molo'ehina

7 To Filatelefia hepatoga Hu'mamofihi yagapana'amagihi agelo ya suhi huto kaba hu noepalana bouba ka'a ma luto fayahi koyo emilenogo lu epilibe: Bati nominana to fotogo nohina bouba mone gihiti bo, Tebitihi, kafemofihi foloke'a li'ohuto kafe sigi hokolo hu'ehinogo moneuba buto li hekini melalube'mu hibe. To li hekini lo'ehinogo moneuba kafe mesigilube'mu hibe. 8 Ai ya'ma lenali kumu ya luto nolibe: Nani lolo hite melete hilata nehanamofihi hapa'a keheli'ohube. Keheli'ahafihe? Nani lenubulo kafe mone sigi lepelenogo ya'ma moneuba kafe gi hekini melalube'mu hibe. Lenali amuyatini nesi'asi ni'ina ya'ma keheli'ohube. To sibigopa ya'ma kaga'ni li pili kete lite minete nigi'ni ya'ma mehe'mi'ahanamo ni'ibe. 9 Kehelilo. Satahi li gehesa'aloti bona'i luga'a enali Yuta bona'i nohune lite lilata nehana yamagi faga hiti lilete Yuta bona'i lamana'amo menehabe. Nani enali'i ya'ma enimi'i moloto enohoka hugo lenalitoga henetite enalapusa fi lepilune'mu habe. Ya nehite lenali kumu ya'ma komopa'ni lepi'ohuna bona'i nehabe lite kehelilune'mu habe. 10 Lenali kosele kasele'i mehese negeba hite minalabe luto lu lepolo'ohuna kaga'ni ya'ma li pili kete lite mine'ahanamo ni'inaya, yana'mu enimi'i mololata kana'a ya'ma noto noto bona'i enalitoga mino lito bilinamoya, lenalitoga minomo bu lalibe luto nani'ni ya'ma gegisa fi lepoloto kaba hu lepalalube'mu hube. 11 Nani mele'isi henetilube'mu hube. Ya'mu moneuba sekele mamu'a hiti kakilitini suba to lalibe lite lenali ana'ina li'ahanamo ya'ma kaba hu bati hite li pili kete lilete minalo. 12 Luga'amagi enali mono kagu ule'ale hite mine lite bite Satahi luba'a be ligilana'amagi ya'ma afo'nifu Hu'mamofihi sipi mono nopofihi lapusa'a ya suhi huto fi epelenogo'ni enali yagu ule'ale hite nehite aku'i fegutoga mone leke ho melimilune'mu habe. To enali enugupisalo Hu'mamofihi gi'amofihi fayaha'a to Hu'mamofihi ai tegi hepa'mofihi gi'a ana suhi huto enali enugupisalo fayahi kayalube'mu hube. Ya'ma Yelusale hepa'i kosaba'i ya'ma kokulumagu Hu'mamofitogati limilube'mu hibe. To nani nigi'ni hiti kosaba'i ya'ma enali enugupisalo kayalube'mu hube.

13 Sikalafu'uba Hu'mamofihi yagapana'a li gehesa hi'ahanamagihi ka'a ya'ma luto lu noepina ya'ma enegekesa hokolo hinogo keheliya ite kehelilabe.

Leotisia bonatoga ka'a molo'ehina

14 To Leotisia hepatoga Hu'mamofihi yagapana'amagihi agelo ya suhi huto kaba hu noepalana bouba ka'a ma luto fayahi koyoto emilenogo lu epilibe: Ka lamana'a lu latanamofihi hapa'a nohina bouba ka'a ligo ule'ale hulata nohina bouba lusi lu yete hose bouba Hu'mamofitogati ana'ina huto hu'ehina yanamofihi hapa'a nohilina lenali kumu ma luto nolibe: 15 Lenali lolo hite melete nehanamofihi hapa'a keheli'ohube. Lenali mono ka kumu yabe lite amuya melete li mukoho menelabe to amuya melete li yasi hi su mehe'ahana ya'ma keheli'ohube. Ketipa ito minalune litemo ya'ma ketipa ilenogo minalanamoya, lenali mukoho lolenogo bati nohinagi to ketipa ilenogo bati nohinagihe luto nolube. 16 Lenali mukoho melose to ketipa meise nehanamoya, yegeuba nagami'i nesi'a lo'ehina tegi hu'ehinamo nehanagi nabagaguti mu bili lepilenogo lite minalube'mu habe. 17 Lenali lenalitini'mu ma lite kehelilata nehabe: Lali babu yogo fe'nohi ni'ibe lite bati huto minalune'mu hune nelabe. Lali hena nasana'mu mone sa sa hulata nohune? Ana'ina lilata nohuta yanamofihi nasana'mu mone sa sa mehune lite lilata nehanaya, lenali amuya memele'ahana hapatini mekehelise bona'i mone muhi meni'ina bona'i ate ate li'ahana'a enugufa yapako nehite bu pisi lina bona'i suhi hite nehabe. Ya'amagi ya'ma enali keheli fe lite kehelilana'a mehabe. 18 Ya hu'ehina'mu lenegekesa lito lu lepilugi kehelilo. Lenali nanitogati goli efahi hetofana'a mina'a tito ni'ina ya'ma mina filenogo bati fe'nohatini hiti bona'i minalanagihe. To koholi guketemofihi hapa'a mina filete lite i kolo bite lenugufa yapako minago buya ligo fi etalabe. To lenubutinimofihi mesebe'amofihi mina filete lenubuluga ya'ma felenogo aku gili gili hilibe. 19 Nani komopa'ni epi'ohuna bona'i ya'ma ka epekito osahi epito enele'mo bati hulata nohube. Ya hu'ehina'mu lenali amuya melete foipa hapatini he'mite komopatini li gelehe hilo. 20 Kehelilo. Nani kafega nohuto begele begele tito ilata nohube. Luga'amagi enali kaga'ni ya'ma kehelilete kafe sigi netenogo enali nonugu tilube'mu hube. Tito nose'na lamana'a noto epito hinogo enali hiti nani hiti noto minalune'mu hune. 21 Nani amuya moloto Satahi be ligilogo afo'nifu ya'ma ai'a sekele mamu'a hiti kefa hisa minolatana nohinalo minolata nohube. Luga'amagi enali monolugu amuya melete mine lite bite Satahi luba'a be ligilana'a ya'ma ana suhi hite nani'ni ya'ma elesa melenogo nani sekele mamu'a hiti kefa hisalo nohuna namaha'aga moneka minaluta'mu yabe.

22 Sikalafu'i yauba Hu'mamofihi yagapana'a li gehesa hi'ahanamagihi ka'a ya'ma luto lu noepina ya'ma enegekesa hokolo hinogo keheliya ite kehelilabe.